W Gduńskù òd pôru miesãców je wëstôwk
w Centrze sw. Jana pòd titlã „Gduńsk - dwiérze wdôru”, namieniony
skòmplëkòwóny ùszłoce naju stolëcë. Mdze jesz do kùńca smùtana.
W pòdzemnym przeńcym kòle banowi stacëji Gduńsk Główny stoji
drewnianô kònstrukcëjô, jakô je zachãcbą tegò wëstôwkù. Są
na ni nôdpisë „Gdunsk - dwiérze wdôru” w czilu jãzëkach: pòlsczim,
rusczim, miemiecczim, anielsczim, hebrajsczim, jitalsczim.
Ni ma nôdpisu pò kaszëbskù. Czemù? Czëtôj w Òdrodze za miesąc!
10. séwnika do Minysterstwa Bënowëch
Sprôw ë Adminystracëje przëjacha kaszëbsczé przedstôwstwò,
reprezentëjącé Kaszëbskò-Pòmòrsczé Zrzeszenié. Zgrôwã wanodżi
bëło wpisanié Kaszëbów na lëstã etnicznëch miészëznów. Fakt,
że donądka naju na ti lësce nie bëło, òdkrëlë równoczasno
Łukasz Grãdzëcczi (Karno Sztudérów Pòmòranijô) ë pùcczi starosta
Artur Jablonsczi.
Czéj le pòmòrsczé gazétë ò tim napisałë zrobił sã, ni ma wiedzec
czemù, wiôldżi trzôsk. Delegacëjô K-PZ kò nie chca wpisaniégò
Kaszëbów na lëstã nôrodnëch karnów czë miészëznów - chòc wedle
naju to bë bëło barżi szëkòwné - a le etnicznëch, chòc na
Òglowim Spisënkù kòle 20 tës lëdzy mô pòdóné kaszëbską nôrodnosc.
Wiedno są nieżëczny, jaczi le żdają, żebë Kaszëbóm wetknąc
czij. Ti prawie terô krziczą w czilu pismionach, że Kaszëbi
chcą do kògòs sã ùprocëmniac abò że Kaszëbóm chòdzy le ò dëtczi.
Bëło czëc jak wiedno, że Kaszëbi chcą zrobic na Pòmòrzim Jugòsławiją
abò krôj Basków. Móm ju czëté do tegò komentôrz: „Drëgô Jugòsławijô?
Gòran Bregòvić przejedze na kòncertë na Kaszëbë, jo?” Szkòda,
że nie znóm niżódnégò spiéwôka z kraju Basków.
Kaszëbi chcą le swòjich prôw. Delegacëjô jakô pòjacha do Warszawë
- złożonô ze starszëch, statecznëch, spòkójnëch lëdzy - mô
nôdbë Kaszëbów rzekłé na dosc spòkójny ôrt. Mô rzekłé mni
jak bëło mòżno rzec. Téj niech le procëmnicë kaszëbiznë so
zobrazëją, co bë bëło czéjbë tam miast nëch, pòjachelë młodi
- ò barżi gòrący krëwi abò naja Redakcëjô! |